No seu 20 aniversario Ponte…nas ondas! recolleu o Premio Ondas 2014 á mellor cobertura informativa

Os galardóns máis prestixiosos en España de radio, televisión, música e publicidade recoñecen o traballo da Asociación Pedagóxica e Cultural Ponte…Nas Ondas!

Este premio chega cando se están a celebrar os 20 anos de actividade. O xurado valorou o intenso traballo de Ponte…nas ondas! que integra no labor educativo o traballo activo cos medios de comunicación, as TICs e o patrimonio cultural. Ao longo destas dúas décadas ten producido discos e libros como Meniños Cantores, Cores do Atlántico ou Na ponte.

Ponte…nas ondas! ofrece este premio ao alumnado dos centros educativos que son os protagonistas da xornada de comunicación que se realizou anualmente durante 20 anos, e dos múltiples eventos pedagóxicos que ten promovido o colectivo. Tamén ao profesorado que co seu incansable labor fai posible que a experiencia sexa un éxito. A asociación estende tamén o agradecemento aos profesionais dos medios de comunicación que durante estes anos colaboraron na iniciativa e a todas as persoas que en cada actividade se involucran e pasan pola ponte.

Aquí podedes ver o discurso de agradecemento durante a gala de entrega dos galardóns