• A Secretaría Xeral de Política Lingüística e Ponte…nas Ondas! presentan o proxecto dixital MEMORIA E PATRIMONIO que xorde a partir do Certame Imaxes do Patrimonio impulsado pola Asociación.
• O proxecto pon en valor o traballo co patrimonio inmaterial galego-portugués de escolas galegas e portuguesas a partir de álbums fotográficos familiares.
• A iniciativa foi realizada ao abeiro do Fondo de proxectos culturais en lingua galega Xacobeo 2021-2022.
• O IES Plurilingüe Fontexería, en Muros, con longa e intensa traxectoria no traballo co patrimonio, acolleu a presentación este mércores 11 de maio
Nun evento conducido polo alumnado do propio IES Plurilingüe Fontexería, en Muros, presentouse este mércores 11 de maio o proxecto dixital ‘Memoria e Patrimonio’, unha iniciativa que xorde a partir do certame As imaxes do patrimonio impulsado pola Asociación Cultural e Pedagóxica Ponte…nas Ondas!, na procura de poñer en valor o traballo co patrimonio inmaterial galego-portugués de escolas galegas e portuguesas a partir de álbums fotográficos familiares.
O proxecto foi realizado ao abeiro do Fondo de Proxectos Culturais en lingua galega Xacobeo 2021-2022 da Xunta de Galicia e a presentación contou este mércores coa participación do secretario xeral de Política Lingüística, Valentín García Gómez. O representante da Consellería de Cultura, Educación e Universidade explicou que Memoria e Patrimonio é “un proxecto interesante por moitos motivos como a participación da mocidade na preservación do patrimonio, a colaboración interxeracional e a transmisión da lingua galega, xa que todo o que está implicado en Ponte…nas ondas! pon á vista os vencellos lingüísticos e culturais entre a Galicia alén do Miño”.
Valentín García subliñou o “total apoio” ao modelo de boas prácticas impulsado por Ponte…nas Ondas! e destacou a inminente inscrición da asociación como modelo de boas prácticas co PCI (Patrimonio Cultural Inmaterial) no Rexistro das Boas Prácticas da UNESCO. No evento participaron ademais a coordinadora do Equipo de Dinamización da Lingua Galega, Chus Abraldes; a directora do centro, María José Lago, e o presidente de Ponte…nas Ondas!, Santiago Veloso.
“Os momentos máxicos da antropoloxía cultural da nosa terra”
“A fotografía ten esa fascinante evocación da inmortalidade, recuperamos a historia dos avós, dos pais, dos traballos, das viaxes, das festas…permítenos reconstruír os momentos máxicos da antropoloxía cultural da nosa terra; por iso, o Certame de Recolla ‘As imaxes do patrimonio’ é tan importante”. Así o explica Anxo Cabada, fotógrafo e membro do xurado do Certame “As imaxes do patrimonio“, organizado anualmente pola Asociación Cultural e Pedagóxica Ponte…nas Ondas!.
Este experto asina o prólogo da obra ‘Memoria e Patrimonio. Unha boa práctica co Patrimonio Cultural Inmaterial’, libro editado co apoio do Fondo de proxectos culturais en lingua galega Xacobeo 2021-2022. No limiar, Anxo Cabada salienta a importancia das iniciativa da asociación para, desde a escola, “coidar a esencia do que somos”, entender mellor as nosas orixes e non ser simples espectadores da compracencia das imaxes, “senón tamén a axudar a construír unha formación máis solidaria, máis informada, máis crítica e máis coñecedora da nosa historia”.
A iniciativa, realizada ao abeiro do Fondo de proxectos culturais en lingua galega Xacobeo 2021-2022, preséntase este mércores 11 de maio no IES Plurilingüe Fontexería (Muros). No evento de presentación participará alumnado do centro educativo, ademais da coordinadora do Equipo de Dinamización da Lingua Galega, Chus Abraldes, e a directora do centro, María José Lago. O IES Plurilingüe Fontexería é un dos centros con maior participación ao longo das diferentes edicións do Certame Imaxes do Patrimonio e acumula un longo e intenso traballo e implicación na normalización e transmisión do patrimonio inmaterial galego-portugués.
Proxecto multimedia
O proxecto dixital ‘Memoria e Patrimonio’ ofrécenos 25 fotografías seleccionadas entre as recollidas nas primeiras edicións do Certame Imaxes do Patrimonio de PNO!, que en 2022 alcanza xa a súa quinta convocatoria. As imaxes son exemplo de como a mocidade de centros educativos de Galicia e de Portugal toma contacto coas xeracións anteriores e recolle as memorias asociadas ao patrimonio inmaterial galego-portugués a partir de álbums fotográficos familiares.
Cada unha das fotografías vai acompañada dun texto explicativo redactado polo alumnado. Ademais, cada fotografía é interpretada graficamente a través dunha banda deseñada elaborada polo prestixioso ilustrador Andrés Meixide, un colaborador habitual dos diferentes proxectos de Ponte…nas Ondas!
Alén do libro en formato descargable, os materiais contan cunha versión multimedia enriquecida con diversos contidos. Por unha beira, pode consultarse en formato de audiolibro e escoitar os podcasts que acompañan cada unha das imaxes. E por outra parte, proporciónanse unha serie de actividades interactivas pensadas para o aproveitamento didáctico a partir das temáticas relacionadas coas diferentes fotografías. Os materiais están dispoñibles desde este mércores 11 de maio de 2022 no Portal da Lingua da Secretaría Xeral de Política Lingüística e na web de Ponte…nas Ondas! A través das seguintes ligazóns:
https://www.lingua.gal/recursos/todos/_/promovelo/contido_755/memoria-patrimonio-ponte-nas-ondas
http://pontenasondas.org/memoria-e-patrimonio/
Vídeo do evento
Vinte e sete anos de traballo en prol do patrimonio
A Asociación Cultural e Pedagóxica Ponte…nas ondas!, organizadora do certame, leva máis de vinte e cinco anos traballando na divulgación do Patrimonio inmaterial galego-portugués. Coordinados por docentes galegos e portugueses, milleiros de alumnas e alumnos de escolas de Galicia e Portugal teñen participado nos certames de Recolla do Patrimonio Inmaterial organizados pola Asociación.
En decembro de 2022 decidirase a inscrición de Ponte…nas Ondas! na UNESCO como modelo de boas prácticas co PCI (Patrimonio Cultural Inmaterial) no Rexistro das Boas Prácticas da UNESCO. A candidatura foi presentada por parte de Portugal e España en marzo de 2021, será a primeira inscrición para Portugal e Galicia.
V Certame “ As imaxes do patrimonio “
Está aberta a convocatoria da V edición do certame a través da Web www.pontenasondas.org
Convidamos a escolas e familias a participar na vindeira edición.
