• Exposición fotográfica sobre os bens de PCI inscritos na UNESCO de España na biblioteca intercentros do campus de Lugo da Universidade de Santiago
• Obradoiros sobre os saberes tradicionais para os centros educativos no CENTRAD
• Acto central no Museo Provincial de Lugo o 17 de outubro, Día internacional do PCI
PNO! convida aos centros educativos de Galicia e Portugal a celebrar o Día internacional do PCI cunha serie de propostas didácticas e un cartel que poden descargar desde a web www.pontenasondas.org
A UNESCO proclamou o ano pasado o día 17 de outubro como o Dia Internacional do Patrimonio Cultural Inmaterial (PCI), xuntando así unha nova data á do 16 de novembro, Día Internacional do Patrimonio.
A Asociación Cultural e Pedaxógica Ponte…nas ondas! (a única entidade en Galicia acreditada pola UNESCO para o PCI) propón nesta segunda conmemoración un programa para todos os centros educativos para que integren e celebren nas aulas o PCI. Ao mesmo tempo, súmase ás accións que en todo o mundo se desenvolven arredor deste patrimonio vivo, o das persoas e das comunidades portadoras. Nese sentido, Galicia é pioneira na creación dunha rede de centros “modelo Ponte…nas ondas! de boas prácticas co patrimonio cultural inmaterial” que están a integrar o PCI nos seus plans xerais de centro e que conta co apoio da Consellería de Educación da Xunta de Galicia.
Ponte…nas ondas!, que foi considerada un “modelo de boas prácticas” co PCI pola UNESCO, a proposta de Portugal e España, anima á sociedade a acoller esta celebración e a tomar conciencia das expresións e manifestacións do noso patrimonio inmaterial. Apela ás escolas para que transmitan o valor da cultura inmaterial ao alumnado.
ACTOS EN LUGO
Ponte…nas ondas! en colaboración coa Universidade de Santiago de Compostela, o Museo Provincial de Lugo, o Concello de Lugo, o CENTRAD da Deputación de Lugo e a Xunta de Galicia, programou diversos actos para conmemorar o Día Internacional do PCI.
EXPOSICIÓN “O PATRIMONIO VIVO”
No edificio da biblioteca intercentros do Campus de Lugo, do 16 de outubro ao 2 de novembro poderá visitarse a exposición fotográfica sobre os bens de PCI de España que están inscritos na UNESCO, entre os que se encontra o “modelo PNO!” inscrito no Rexistro das boas prácticas co PCI. A exposción poderá ser visitada todos os días (incluídos sábados e domingos) e tamén está aberta ás visitas escolares para as que se deseñou unha ficha didáctica para o alumnado.
OBRADOIROS NO CENTRAD
Durante as datas da permanencia da exposición na biblioteca intercentros, os centros educativos tamén poden solicitar visitas ao Centrad (Centro de Artesanía e deseño) da Deputación de Lugo para realizar obradoiros sobre os saberes tradicionais e tamén visitar a colección de instrum,entos musicais. Débense concertar en: info.centrad@deputacionlugo.org – tf: 982210066.
ENFIANDO O INMATERIAL
Este será o acto central do Día internacional do PCI e terá lugar na Sala dos Mosaicos do Museo Provincial de Lugo ás 19.00 h. É un coloquio aberto á participación do público onde terán cabida diferentes expresións do PCI: a música, a narración oral, a memoria, os saberes. Tamén se proxectará a curtametraxe de Xabier Mailán “Corcosendo:as mans de quen nos vestiu” contando coa intervención do director.
No coloquio tomará a palabra Lois Pérez, profesor, poeta, narrador oral e dinamizador cultural quen enfiará as intervencións de Xermán Díaz, Antía Montes e de Chus Álvarez de Ponte…nas ondas!
