O 26 de maio Ponte…nas ondas ! realizou no Museo do Verbum de Vigo a primeira Biblioteca Viva do patrimonio cultural galego-portugués. Unha xornada á que estiveron convidados os centros educativos da Eurorrexión ata completar o aforo.
A xornada estivo conducida polo actor e narrador oral galego Avelino González e pola portuguesa Helena Faria.
REVISTA ORAL GALEGO-PORTUGUESA
O Museo Verbum transformouse nunha biblioteca viva na que os xoves da Eurorrexión tiveron a oportunidade de dialogar e de interactuar cos libros-vivos.
Unha Biblioteca Viva (Living Library) é unha biblioteca na que os libros son persoas. Persoas con singulares historias de vida ou que posúen determinados coñecementos e que difunden a súa experiencia a través da interacción, a entrevista e o diálogo cos usuarios/as.
A Biblioteca Viva (BV) é un proxecto educativo e cultural que pretende achegar coñecementos ás persoas dun xeito ameno, directo e participativo. É un proxecto de dinamización do coñecemento que convida a indagar e a descubrir aspectos novidosos sobre o tema axudando a combater o descoñecemento, a ignorancia, os prexuízos e os estereotipos dunha maneira activa e vivenciada.
Celebrada por primeira vez en Dinamarca no ano 2000 e promovida dende o 2001 polo Consello de Europa como ferramenta de educación intercultural, a celebración de Bibliotecas Vivas é un fenómeno que comeza a espallarse polo mundo.
A Asociación Cultural e Pedagóxica Ponte…nas ondas! e a Asociación Xandobela ven nesta iniciativa un xeito útil e novedoso de continuar coas súas propostas de recollida e divulgación do Patrimonio Cultural Inmaterial Galego-Portugués. Recentemente, ambas asociacións participaron nun encontro europeo celebrado en Atenas sobre as Bibliotecas Vivas e o Sistema dos Tesouros Vivos.
TEATRO
Na mesma mañá do dia 26, a compañía de teatro Limiar representou unha versión especial da obra Farenheit, baseada nas figuras das persoas-libro da novela de Rab Bradbury. Fahrenheit 451 é o título da novela distópica publicada en 1953 e que foi levada ao cinema por Francois Truffaut. Limiar teatro integrará na representación a persoas-libro representativas do patrimonio galego-portugués.
DOCUMENTAL
E para rematar a xornada, os xoves galegos e portugueses tiveron a oportunidade de visionar o documental BRASIL SOMOS NÓS do gaiteiro Carlos Núñez, sobre a presenza do patrimonio cultural galego-portugués no Brasil.
NAS ONDAS DO VERBUM
Os centros que asistiron ao Verbum tiveron tamén a oportunidade de visitar a exposición GALICIA NAS ONDAS, un percorrido pola historia da radio en Galicia, e na que se recollen tamén as actividades e experiencias realizadas por Ponte…nas ondas! ao longo destes 16 anos.
O 3 DE XUÑO-XVII PONTE…NAS ONDAS! – AS BIBLIOTECAS VIVAS
O 3 de xuño emítese a programación da XVII edición de Ponte…nas ondas! a traves da Web www.pontenasondas.org . Un ano mais, participan centros educativos de Galicia, Portugal, Brasil, Arxentina, Colombia e Cuba.
