Declaración institucional do Parlamento de Galicia en apoio a Ponte…nas ondas!

• Unanimidade dos tres grupos políticos do Parlamento de Galicia que votan unha declaración conxunta en apoio de PNO!
• O documento destaca que a práctica de Ponte…nas ondas! ten sido empregada como un instrumento educativo fundamental para o coñecemento, a salvagarda, a transmisión e continuidade interxeracional do patrimonio cultural.
• A institución súmase así aos apoios recibidos pola asociación sociopedagóxica e cultural nos días previos á decisión final do 17 Comité Intergubernamental para a Salvagarda do Patrimonio Cultural Inmaterial que se celebrará en Rabat a finais de novembro.

“O Parlamento de Galicia, agradece e recoñece o labor de Ponte…nas ondas! a prol da salvagarda do noso patrimonio inmaterial e apoia a inscrición do modelo Ponte…nas ondas! no rexistro das boas prácticas co PCI da UNESCO”. Así conclúe o documento institucional feito público este mércores 9 de novembro de 2022 polo Parlamento de Galicia. Unha declaración institucional que contou coa unanimidade do voto dos deputados de PPdeG, BNG e PSdeG.

Os parlamentarios subliñan que PNO! é unha organización que ten sido “exemplar na identificación, recoñecemento, transmisión, educación patrimonial e dinamización das comunidades por medio dun patrimonio cultural inmaterial transnacional e transfronteirizo. Por esta traxectoria, a UNESCO acreditou a Ponte…nas ondas! como ONG consultora para o PCI en 2015, a única entidade en Galicia”.

Aquí a declaración institucional completa:

http://www.parlamento.gal/Actualidade/3718/declaracion-institucional-de-apoio-a-ponte…nas-ondas/

Declaración institucional de apoio a Ponte…nas ondas!

Coa presentación oficial conxunta en 2021, por parte dos gobernos de España e Portugal, da candidatura para a inscrición no Rexistro de Boas Prácticas de Salvagarda do Patrimonio Cultural Inmaterial (PCI) da Unesco, Ponte…nas ondas! ve recoñecido 27 anos de traballo e supón un aval a toda unha práctica educativa e cultural realizada desde os centros educativos. O seu labor é tamén coñecido pola iniciativa de promover a primeira candidatura do patrimonio inmaterial galego-portugués á UNESCO en 2004.
 
A práctica de Ponte…nas ondas! ten sido empregada como un instrumento educativo fundamental para o coñecemento, a salvagarda, a transmisión e continuidade interxeracional do patrimonio cultural.
 
Ponte… nas ondas! identificou o conxunto do patrimonio común galego-portugués, por riba das fronteiras administrativas, antes mesmo da consideración do PCI por parte da UNESCO e da entrada en vigor da Convención para a salvagarda do patrimonio cultural inmaterial en 2003.
 
Ponte… nas ondas! levou o patrimonio cultural inmaterial ás aulas da Eurorrexión a través da práctica radiofónica e integrando ás persoas e comunidades portadoras do PCI nos programas de radio, no audiovisual e nas redes sociais, poñendo en valor e garantindo o coñecemento do patrimonio, así como a súa transmisión interxeracional e a súa preservación.
 
Ponte…..nas ondas! ten colaborado con administracións, institucións e universidades galegas e portuguesas na procura de divulgar este patrimonio compartido e favorecendo o seu coñecemento e a súa identificación por parte da sociedade.
 
O traballo de Ponte…nas ondas! ten contribuído á revalorización de prácticas e saberes que melloran o benestar e a calidade de vida das persoas e comunidades portadoras, dando visibilidade ao seu patrimonio e fomentando un desenvolvemento sustentable, con transferencia de saberes ás novas xeracións.
 
Unha organización que ten sido exemplar na identificación, recoñecemento, transmisión, educación patrimonial e dinamización das comunidades por medio dun patrimonio cultural inmaterial transnacional e transfronteirizo. Por esta traxectoria, a UNESCO acreditou a Ponte…nas ondas! como ONG consultora para o PCI en 2015, a única entidade en Galicia.
 
Por todo o exposto, o Parlamento de Galicia, agradece e recoñece o labor de Ponte…nas ondas! a prol da salvagarda do noso patrimonio inmaterial e apoia a inscrición do modelo Ponte…nas ondas! no rexistro das boas prácticas co PCI da UNESCO.

Santiago de Compostela, 9 de novembro de 2022

Compartir

DEIXA UN COMENTARIO

Please enter your comment!
Please enter your name here