• Galardón promovido polo EDLG da EPAPU Albeiros de Lugo en homenaxe a quen foi directora deste centro educativo e recoñecida activista cultural e en prol da lingua galega.
• A asociación recibiu o recoñecemento durante o evento celebrado este venres 20 de xuño na sede da escola en Lugo.
A EPAPU (Centro Público de Educación Permanente de Adultos) Albeiros de Lugo celebrou este venres 20 de xuño o remate do curso coa entrega do I Premio María Xosé Rodríguez Valcarcel á Asociación Ponte… nas ondas!
Segundo recordou a actual directora do centro, Amalia Vázquez, na súa lembranza da finada autora e docente, PNO! representa o espírito de tender pontes que María Xosé Rodríguez Valcárcel defendía e reivindicaba, e é por este motivo que o centro considerou a asociación merecedora de iniciar a andaina do galardón. Os promotores do premio subliñaron que PNO! realiza un labor desinteresado e solidario cos centros educativos, “asemade de realizalo en lingua galega e, neste caso, arrequentado co idioma irmán portugués. Ponte máis que solidaria”. A EPAPU Albeiros considera así que Ponte…nas ondas! constitúe o mellor exemplo para a iniciar este premio que honra a memoria dunha persoa que se distinguiu polo seu coñecemento, polo amor á docencia e á cultura.
María Xosé Rodríguez Valcárcel, vida de cultura e compromiso
Nun evento no que asistiron tamén a nai e a irmá de , lembrouse a intensa vida de compromiso desta profesora de lingua galega, doutora, investigadora, políglota e tradutora, ávida lectora e tamén directora deste centro de Adultos. Moi coñecida no mundo da docencia e da cultura da cidade de Lugo así coma nas asociacións en defensa da lingua galega, María Xosé foi autora de diferentes publicacións sobre sociolingüística e en 1996 gañou a décima edición do Premio literario Ánxel Fole, co libro ‘Aureliano J. Pereira no rexurdimento galego’. No acto lembrouse tamén o seu labor como tradutora, especialmente o volume ‘Ás voltas coa diversidade cultural. As conferencias de Claude Lévi-Strauss para a UNESCO’.
Na defensa da ponte do patrimonio galego-portugués
Ao escritor e investigador do patrimonio cultural Antonio Reigosa, quen foi colaborador de diversos proxectos da Asociación e tamén xurado dos certames de recolla da tradición oral galego-portuguesa, correspondeulle o labor de facer breve resumo da traxectoria de PNO! ao longo destes 30 anos de actividade. Reigosa lembrou especialmente o traballo e a repercusión no seu momento da presentación da candidatura á UNESCO do patrimonio oral galego-portugués, e destacou que PNO! é un modelo en todos os sentidos “nun momento no que a creación de pontes entre Galicia e Portugal é máis necesaria que nunca” para superar os impedimentos a esa relación natural que ten que haber entre os dous pobos.
Interviron por último o presidente de PNO!, Santiago Veloso, quen aproveitou para recordar o recente e magnífico evento celebrado pola comunidade educativa luguesa no auditorio Fuxan os Ventos para a celebración do 30 aniversario de PNO!, e a secretaria de PNO!, Chus Álvarez, quen falou da realidade conseguida á fin da rede de centros modelo de boas prácticas co patrimonio inmaterial, convidando os centros lugueses a unírense ao proxecto.
