Celebrado en Caravaca (Murcia) os días 12,13 e 14 de febreiro.
O Ministerio de Cultura convidou a Ponte…nas ondas! a expoñer a súa experiencia xunto con outras asociacións e entidades que traballan co Patrimonio Cultural Inmaterial.
A Casa da Cultura «Emilio Sáez», de Caravaca de la Cruz, acolleu o V Encontro Nacional de Xestores de Patrimonio Cultural Inmaterial, no que participaron representantes de entidades, administracións públicas, comunidades, investigadores, asociacións e colectivos encargados de preservar e organizar manifestacións que en España gozan da declaración de Patrimonio Cultural Inmaterial pola UNESCO ou que optan a conseguila.
As xornadas, promovidas pola Subdirección de Xestión e Coordinación dos Bens Culturais do Ministerio de Cultura, coa colaboración do Concello de Caravaca de la Cruz, tiñan como obxectivo servir de punto de encontro entre distintos lugares de España para intercambiar experiencias, compartir boas prácticas e poñer en común problemáticas e solucións. As temáticas deste encontro centráronse no «Patrimonio Inmaterial, sustentabilidade ambiental e cambio climático».
O presidente do Bando dos Cabalos do Viño, José Antonio Rubio, foi o encargado de abrir as xornadas dando a benvida a todos os participantes e subliñando algúns aspectos da festa, que foi declarada Patrimonio Inmaterial no mes de decembro de 2020. A continuación, a través de videoconferencia, interveu Ángeles Albert, directora xeral de Patrimonio Cultural e Belas Artes, quen destacou que «encontros como este son de gran utilidade para avanzar no coñecemento e na salvagarda da nosa cultura».
Tamén se dirixiu aos asistentes o director xeral de Patrimonio Cultural da Rexión de Murcia, Patricio Sánchez, e pechou as intervencións da inauguración o alcalde de Caravaca, José Francisco García, quen destacou que «este encontro é o mellor foro para compartir boas prácticas no referente á conservación, defensa e difusión do noso patrimonio cultural inmaterial e para nós supón, ademais, unha nova oportunidade para agradecer todo o apoio que no seu día recibimos para que os Cabalos do Viño fosen inscritos pola UNESCO na Lista Representativa do Patrimonio Cultural Inmaterial da Humanidade».
A primeira ponencia das xornadas estivo a cargo da subdirectora xeral de Xestión e Coordinación dos Bens Culturais do Ministerio de Cultura, María Agúndez, que compartiu un resumo do traballo da reunión da Comisión de Patrimonio Cultural Inmaterial celebrada en Paraguai o pasado mes de decembro. Na primeira mesa redonda participou Juan López, coordinador da Casa Museo dos Cabalos do Viño, xunto con Ana Mendoza, do Ministerio de Agricultura, Pesca e Alimentación, que falou sobre a Dieta Mediterránea; Plano Manzano, do Basque Centre for Climate Change; e Mario Pallaruelo, dos nabateros de Sobrarbe no Pireneo Oscense.
Nas xornadas participaron representantes técnicos do Ministerio de Cultura, así como doutras administracións e entidades, entre as que se atopan o Consell Insular de Menorca, a Asociación de Peñas de Tamborileiros de Hellín, a Generalitat Valenciana, o Consello de Homes Bos da Horta de Murcia, o Concello de Berga, o Instituto do Patrimonio Cultural de España, a Universidade de la Plata (Arxentina), a Asociación Amigos dos Patios Cordobeses, a Asociación Española de Cetraría e Conservación de Aves Rapaces (AECCA) e o Museo Nacional do Traxe, entre outras entidades.
‘Os patios de Córdoba’, ‘Os corros esparteros. Coñecementos e técnicas da espartería’, ‘Os oficios tradicionais como métodos e prácticas de sustentabilidade’, ‘A preservación da pleita e fortalecemento comunitario no Parque Natural da Península de Llevant (Mallorca)’, o “Plan Nacional de Educación Patrimonial” ou ‘A cetraría’ foron algúns dos contidos reflectidos na programación deste quinto encontro de xestores do patrimonio cultural inmaterial.
Ponte…nas ondas! participou na mesa “El cambio climático y el PCI: experiencias de gestión” como ben inscrito no Rexistro das boas prácticas co patrimonio cultural inmaterial da UNESCO en 2022. A exposición, a cargo de Santiago Veloso, serviu para homenaxear a todos os centros educativos que ese día estaban a celebrar o Día Mundial da Radio. Presentouse o portal Escolas nas ondas con toda a programación sobre “a radio e o cambio climático”, tema proposto pola UNESCO para esta edición. A intervención foi acompañada dun vídeo sobre os 30 anos da experiencia e presentáronse as actividades que se están a desenvolver neste 30 aniversario.
As xornadas finalizaron coa visita ao centro educativo La Santa Cruz de Caravaca, un centro que traballa coa radio e co patrimonio cultural inmaterial e onde o alumnado presentou unha aplicación para aplicar ao seu patrimonio cultural.
